‘e stamme arruvinanne tutte cose
il Cenacolo della Cultura (Pro Loco Minori costa d’Amalfi)
MA ‘O PRISEPIO CCHIU’ NISCIUNO ‘O FA !…
E’ stata ‘na stagione chiéna ‘e fuoco
‘O càvero ce’ha acciso a ttutte quante
E quante sofferenze, ovèro tante !
Ammo priato ca fermasse ccà !
“E nun è mmeglio ‘o friddo ?” avimmo ditto
“Cazone ‘e lana, mutandone ‘a sotto
Tre sciarpe, doje magliune, ‘nu cappotto
Si fòre scioscia, nun me mòvo ‘a ccà !”
E ‘a vernata è ttutta ‘n’ata cosa
‘A mente s’acquièta, è presto detto
Appicce ‘a legna sott’ ’o caminetto,
‘ntacch ‘e ccastagne, pronte pe’ scuppà’ !
Dicembre è friddo, e già sta arrèto a’ porta
‘A mente vola, e torna a ‘e tiempe antichi :
sciuscèlle, nuce e po’ ‘na vranca ‘e fichi,
pe nnuje guagliune, chi s’ ‘o ppo’ scurdà ‘!
‘O friddo, embé, ce’ ‘o vò, è già Natale
Biato ‘o Pataterno ca ce’ ‘o manna
Bell’ ‘o prisepio, gloria d’ ’a capanna
‘O vòjo e ll’aseniello a ttriunfà ‘ !
Grandezza ‘e Dio, ‘a pace d’ ‘a famiglia
Se torna criature ‘n’ata vòta
‘O munno gira, e gira pure ‘a ròta,
ma ‘o prisepio cchiù nisciuno ‘o fa !!!….
Scala 12.10.2021 Enzo Del Pizzo